Lista e shkrimeve | Kërko shkrime | Të gjitha shkrimet në kategorinë Rezymetë | Të gjitha shkrimet nga Altin Xhikneli

Si të shkruajmë një Rezume

Shkruar nga Altin Xhikneli - 25/01/2007
 
"Resumeja, (përmbledhja e të dhënave tuaja personale) është arma më e rëndësishme kur kërkoni një punë të re. "
 
Shumica e kompanive shqiptare kur kanë të lirë një vend pune, rrëmojnë nëpër rezumet për të gjetur kandidatët më të përshtatshëm. Në rast se rezumeja juaj nuk ua mbush mendjen, atëherë ju jeni i përjashtuar nga ai vend pune që në fazën e parë. Kështu, bankat, kompanitë e sigurimit, kompanitë shumëkombshe dhe kompani të tjera që kërkojnë përgjithësisht punonjës të kualifikuar kur kanë vend të lirë pune, analizojnë rezumet që kanë çuar kandidatë të ndryshëm. Pra, për t’u futur në punë duhet t’i kushtoni rëndësi të madhe rezumes. Shmangni lajle-lulet dhe komplikimet kur shkruani një rezume. Koha që i kushtohet një rezumeje është 5 sekonda, kështu që ajo duhet të jetë e shkruar në atë mënyrë që brenda atij 5 sekondëshi të tërheqë vëmendjen e lexuesit- në qoftë rezumeja është shumë e komplikur është e sigurtë se do të hidhet në kosh të plehrave.

Gjatësia e Rezumesë

Nuk ka asnjë rregull që tregon se sa e gjatë duhet të jetë rezumeja juaj - kjo kushtëzohet pak edhe nga historia juaj e karrierës, edukimit dhe arritjet. Mundohuni që informacioni i rezumesë të jetë në një faqe pa e ngjeshur shkrimin. Çdo gjë duhet të jetë precize në mënyrë që lexuesi të mos kërkojë për të gjetur informacionin. Mos harroni që në rezume të përfshini karrierën, pikat tuaja të forta, çmimet dhe arritjet që keni bërë si dhe numrat e telefonit.

Shembull për shkrimin e një Rezumeje

Një format bazë për të shkruajtur një Rezume: Fillo me emrin, adresën dhe numrat e telefonit duke i shkruar ato në fillim të faqes me gërma të mëdha. Vazhdoni me një profil tuajin në të cilin mund të përfshini zotësitë, eksperiencën dhe objektivat që doni të arrini në karrierë. Pas kësaj mund të shkruani historinë e karrierës – në rend të mbrapshtë kronologjik duke filluar nga 10 vitet e fundit – me përshkrime të shkurtra të arritjeve tuaja.

Pas kësaj vjen edukimi, detaje të interesave personale dhe referencat

Kujdesuni që të shkruani gjithmonë të vërtetën dhe printojeni rezumen në letër A4. Mos i bashkangjisni rezumesë asnjëherë dokumente të tjera, letra ose certifikata- ruajini ato për ditën e intervistës. Lexojeni dhe rilexojeni rezumenë dhe jepjani për ta lexuar edhe shokëve ose anëtarëve të familjes për ta lexuar me kujdes. Kujdes që rezumeja të mos ketë gabime ortografike ose njolla kafeje pasi kjo mund të jetë fatale. Mos u përpiq asnjëherë të zgjasësh periudhat e punësimit për të fshehur periudhat e papunësisë. Në rast se del mashtrimi ka mundësi që ju ta humbni punën.

Përfitimi nga puna pa pagesë

Kur nuk gjeni dot punë mos hezitoni të punoni në një kompani pa pagesë. Ju mund të gjeni një punë pa pagesë në kompanitë e njerëzve tuaj të afërt. Shmangni kalimin e kohës në shtëpi kur jeni pa punë. Punësimi pa pagesë mund t’ju ofrojë edhe kënaqësi! Por plusi më i madh kur ju punoni pa pagesë është shtimi i pikëve në rezumenë tuaj. Ju mund të merrni eksperiencë nga punonjës që kanë kohë që punojnë në një punë. Punët pa pagesë janë parë shpesh si mundësia e fundit për të punuar, por mos ja hiq vetes mundësinë për të marrë avantazhet nga kjo punë. Për të gjetur një punë pa pagesë ju mund të pyesni prindërit, motrat, vëllezërit dhe shokët që të punoni në kompaninë e tyre. Profesorët nëpër universitete mund t’ju ndihmojnë gjithashtu për të gjetur një vend pune pa pagesë në një kompani që ju keni dëshirë të punësoheni. Kur shkoni në një punë, tregoni interes për të mësuar se çfarë ndodh në atë zyrë dhe në zyrat e tjera të asaj kompanie. Në qoftë se shefi ju merr me sy të mirë, edhe në qoftë se nuk punësoheni në atë kompani ju mund të merrni një referencë nga ai për ta përdorur në rezumenë tuaj.

Kur shkoni në një kompani pa pagesë mos rrini të ngulur në një zyrë, por lëvizni nga një departament në tjetrin. Drekën mundohuni ta hani me punonjësit për të mësuar diçka prej tyre pasi njerëzit mund të flasin më lehtë kur nuk janë në zyrë. Kërkoni të bëni diçka dhe mos rrini në një cep duke lexuar gjithë ditën letrat. Është e rëndësishme të jeni të sjellshëm, të shoqërueshëm dhe të mos ngacmoni nervat e askujt. Është një eksperiencë që mund t’ju vlejë për t’u punësuar.


 
Kushtet e përdorimit | Politikat e intimitetit | Rreth nesh | Përkrahja | Na rekomandoni | Bizneset

Copyright © 2003-2010. Të gjitha të drejtat e rezervuara. Riprodhimi i plotë apo i pjesërishëm në çfarëdo lloj forme apo mediumi pa autorizimin me shkrim nga Ofertapune.com është i ndaluar. Oferta Pune, Ofertapune.com si dhe logot përkatëse janë marka tregtare të Ofertapune.com LLC.